សៀមរាប៖ ចាប់ពីខែមករា ដល់ខែឧសភា ឆ្នាំ២០២៣ កម្ពុជាទទួលបានចំណូលពីការលក់សំបុត្រចូលទស្សនាអង្គរបានជាង ១៦លានដុល្លារកើនឡើងជាង ៨០០ភាគរយ បើធៀបនឹងរយៈពេលដូចគ្នាក្នុងឆ្នាំ២០២២។

របាយការណ៍គ្រឹះស្ថានអង្គរបានឱ្យដឹងថា រយៈពេល ៥ខែ ឆ្នាំ២០២៣ ចំណូលដែលកម្ពុជាទទួលបានពីការលក់បណ្ណចូលទស្សនារមណីយដ្ឋានអង្គរពីភ្ញៀវទេសចរជាង ៣៤៤ ៧៥៧នាក់ មានចំនួន ១៦ ០៦៥ ៨២៩ដុល្លារ កើនឡើង ៧៦៥,៤២% ភាគរយធៀប បើនឹងរយៈពេលដូចគ្នាក្នុងឆ្នាំ២០២២។

របាយការណ៍ដដែលបានឱ្យដឹងថា ក្នុងខែឧសភា ឆ្នាំ២០២៣ គ្រឹះស្ថានអង្គរ រកចំណូលបានចំនួនបាន ២ ០៣៤ ៦២៣ដុល្លារដុល្លារអាមេរិក ពីការលក់បណ្ណដល់ភ្ញៀវទេសចរបរទេស ចូលទស្សនារមណីយដ្ឋានអង្គរ ចំនួន ៤៥ ៧៥៩នាក់។

គួរឱ្យដឹងដែរថា រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាមានក្តីរំពឹងថានឹងទទួលបានភ្ញៀវទេសចរអន្តរជាតិប្រមាណពី ២៥ម៉ឺននាក់ ទៅ ៥០ម៉ឺននាក់ ក្នុងពេលកម្ពុជាទទួលរៀបចំធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣៕